Irani është i gatshëm të shqyrtojë kompromise për të arritur një marrëveshje bërthamore me Shtetet e Bashkuara të Amerikës, nëse Uashingtoni pranon të diskutojë heqjen e sanksioneve, thotë zëvendësministri i Jashtëm iranian, Majid Takht-Ravanchi.
Ai theksoi se “topi është në fushën e Amerikës për të dëshmuar se dëshiron një marrëveshje”, duke shtuar se nëse SHBA-ja tregohet e sinqertë, atëherë “rruga drejt një marrëveshjeje është e hapur”, shkruan BBC, transmeton Dukagjini.
Nga ana tjetër, zyrtarë amerikanë kanë deklaruar vazhdimisht se është Irani ai që po zvarrit procesin e negociatave. Sekretari amerikan i Shtetit, Marco Rubio, tha së fundmi se presidenti Donald Trumppreferon një marrëveshje, por se është “shumë e vështirë” të arrihet një e tillë me Teheranin.
Trump ka paralajmëruar me sulme ndaj Iranit nëse nuk arrihet një marrëveshje për kufizimin e programit të tij bërthamor, ndërkohë që SHBA-ja ka shtuar praninë ushtarake në rajon.
Bisedimet e fundit indirekte mes dy vendeve janë zhvilluar në Oman në fillim të shkurtit, ndërsa një raund i dytë pritet të mbahet në Gjenevë. Takht-Ravanchi i përshkroi diskutimet si “në përgjithësi pozitive”, por theksoi se është ende herët për të nxjerrë përfundime.
Zëvendësministri iranian theksoi se Teherani ka ofruar të hollojë uraniumin e pasuruar në nivelin 60%, si dëshmi e gatishmërisë për kompromis. Aktualisht, Irani ka mbi 400 kilogramë uranium të pasuruar në nivele të larta, çka ka rritur shqetësimet ndërkombëtare për mundësinë e zhvillimit të një arme bërthamore – akuzë që Irani e mohon vazhdimisht.
Ai nuk konfirmoi nëse Irani do të pranonte ta dërgonte jashtë vendit këtë rezervë uraniumi, siç kishte bërë në marrëveshjen bërthamore të vitit 2015, nga e cila administrata Trump u tërhoq në vitin 2018. Në atë kohë, Rusia kishte pranuar mbi 11 mijë kilogramë uranium të pasuruar në nivel të ulët.
Takht-Ravanchi theksoi gjithashtu se Irani nuk do të diskutojë programin e tij të raketave balistike me negociatorët amerikanë, duke e konsideruar atë si pjesë të kapaciteteve mbrojtëse të vendit. Ai kritikoi deklaratat e ndryshme të Trump, veçanërisht përmendjen e mundshme të ndryshimit të regjimit në Iran, duke thënë se mesazhe të tilla nuk janë përcjellë në kanalet diplomatike.
Sipas tij, një konflikt i ri do të ishte “traumatik dhe i dëmshëm për të gjithë rajonin”, ndërsa paralajmëroi se nëse Irani e ndjen veten të kërcënuar në mënyrë ekzistenciale, do të reagojë.
Pavarësisht skepticizmit të shumë vëzhguesve për arritjen e një marrëveshjeje të re, zyrtari iranian u shpreh se delegacioni i Teheranit do të shkojë në Gjenevë me shpresën se mund të arrihet një dakordim, duke theksuar se edhe pala tjetër duhet të dëshmojë sinqeritet.