Policia e Kosovës u ka bërë thirrje qytetarëve që të tregojnë kujdes të shtuar gjatë qarkullimit në rrugën Pejë–Rugovë, për shkak të rrezikut nga shembja e gurëve.
Sipas njoftimit, ditëve të fundit në këtë segment rrugor janë regjistruar disa raste me dëme materiale dhe persona të lënduar. Si pasojë e reshjeve të vazhdueshme atmosferike, është rritur mundësia e rrëshqitjes dhe shembjes së gurëve përgjatë rrugës.
Policia ka kërkuar nga drejtuesit e automjeteve dhe të gjithë pjesëmarrësit në trafik që të jenë të kujdesshëm, të respektojnë sinjalizimin rrugor dhe të përshtatin shpejtësinë me kushtet e rrugës, në mënyrë që të shmangen aksidentet e mundshme.
Drejtoria Rajonale e Policisë në Pejë thekson se mbetet e përkushtuar në garantimin e sigurisë për qytetarët dhe apelon për bashkëpunim.