Presidentja e Kosovës, Vjosa Osmani, ka përkujtuar 28 shkurtin e vitit 1998, duke theksuar se atë ditë regjimi gjenocidal i Serbisë kreu një nga aktet më të rënda të terrorit shtetëror në Kosovë, me vrasjen e 24 banorëve të Likoshanit dhe Qirezit, prej të cilëve 20 civilë dhe katër dëshmorë të UÇK-së.
Osmani ka vlerësuar se kjo masakër ishte një përpjekje brutale për ta shuar frymën e lirisë që po forcohej në Drenicë dhe në mbarë vendin.
Sipas saj, sakrifica e të rënëve u shndërrua në thirrje për rezistencë dhe dinjitet kombëtar. Ajo ka theksuar se gjaku i martirëve të Likoshanit dhe Qirezit u bë pjesë e themeleve mbi të cilat u ndërtua rrugëtimi drejt çlirimit dhe shtetndërtimit të Kosovës.
Presidentja ka nënvizuar se kujtimi i tyre mbetet amanet për drejtësi dhe për ruajtjen e lirisë së fituar me sakrificë.
“Lavdi e përjetshme të rënëve të Likoshanit dhe Qirezit”, ka përfunduar Osmani.