Kryeministri i Shqipërisë, Edi Rama, ka paralajmëruar masa për të monitoruar dhe stabilizuar çmimet në treg, duke theksuar se institucionet do të kryejnë kontrolle dhe verifikime të vazhdueshme për të parandaluar rritjet e pajustifikuara.
Në podkastin e tij “Flasim”, Rama tha se qeveria është duke finalizuar krijimin e një mekanizmi shtetëror me ndikim në tregun e brendshëm të naftës, i cili synon të luajë rol stabilizues dhe të rrisë transparencën në formimin e çmimeve.
Sipas tij, ky mekanizëm do të kontribuojë në garantimin e furnizimit me karburant në treg, si dhe në forcimin e kontrollit mbi mënyrën e funksionimit të tregut të naftës.
“Nuk do të rrimë duarkryq përballë kësaj situate. Jemi në momentin kur do të finalizojmë krijimin e një faktori shtetëror me impakt në tregun e brendshëm të naftës, i cili do të luajë rolin e stabilizuesit të tregut, do të ndikojë në rritjen e transparencës së çmimit dhe do të garantojë furnizimin në treg, duke pasur në mbështetje një kapacitet shumë të rëndësishëm siç është garancia sovrane”, u shpreh Rama.