Partitë socialiste dhe aleatët e tyre kanë arritur të ruajnë kontrollin në katër qytetet më të mëdha të Franca – Paris, Marsejë, Lion dhe Lil – në kuadër të zgjedhjeve vendore, duke i dhënë një shtysë forcave tradicionale përpara zgjedhjeve presidenciale të ardhshme.
Megjithatë, kandidatët e krahut të majtë radikal dhe të djathtës ekstreme kanë shënuar disa suksese të rëndësishme. Në Nisë fitoi një aleat i Marine Le Pen, ndërsa në Rube, në veri të vendit, triumfoi një kandidat i partisë Franca e Pabindur (LFI).
Një nga mesazhet kryesore të këtyre zgjedhjeve ishte dështimi i bashkëpunimit mes së majtës tradicionale dhe LFI-së, pasi në disa zona votuesit u orientuan drejt qendrës dhe së djathtës, përfshirë bastione të mëparshme socialiste si Klermo-Ferand dhe Brest.
Në qytete si Parisi, Marseja dhe Lil, administratat e majta arritën të konfirmojnë mandatin pa vështirësi. Ndërkohë, në Lion, kryebashkiaku ekolog Gregory Doucet siguroi një tjetër mandat pas një aleance me LFI-në, në një garë ku rivali i djathtë zhvilloi një fushatë të dobët.
Debatet rreth LFI-së kanë qenë të forta, sidomos pas akuzave ndaj një anëtari të saj për nxitje dhune, si dhe deklaratave të diskutueshme të liderit Jean-Luc Mélenchon.
Megjithatë, pavarësisht kritikave, disa kandidatë socialistë dhe të gjelbër zgjodhën të bashkëpunojnë me LFI-në në raundin e dytë, duke krijuar aleanca që u cilësuan nga kundërshtarët si “aleanca e turpit”.
Këto bashkëpunime nuk dhanë rezultate në disa qytete të tjera si Tuluz, Strasburg, Puatje, Limozh dhe Tul – kjo e fundit zonë tradicionale e ish-presidentit François Hollande, ku thirrjet për bojkot të LFI-së nuk patën ndikim.