Kryetarja e Kuvendit të Kosovës, Albulena Haxhiu, ka deklaruar se seanca e ndërprerë më 5 mars për zgjedhjen e presidentit nuk është përmbyllur, por do të vazhdojë sapo të krijohen kushtet e nevojshme.
Ajo ka theksuar se pret që kryeministri Albin Kurti të thërrasë takime me partitë politike, me qëllim arritjen e një zgjidhjeje për procesin e zgjedhjes së presidentit.
“Në seancën e 5 marsit kam thënë që ndërpritet por jo përmbyllet, dhe ajo do të hapet kur të plotësohen kushtet. Pres që të ketë ftesa për takime nga kryetari i LVV-së, kryeministri Albin Kurti, për subjektet politike”, ka thënë Haxhiu.
Ajo ka shtuar se është e rëndësishme që përmes këtyre diskutimeve të arrihet një zgjidhje dhe të shmangen zgjedhjet e jashtëzakonshme.
“Uroj që këto diskutime dhe takime të çojnë deri te një zgjidhje për çështjen e presidentit. Është e rëndësishme që vendi të mos shkojë në zgjedhje të jashtëzakonshme, sepse kemi humbur shumë kohë dhe kemi shumë punë për të bërë”, ka theksuar ajo.
Haxhiu u ka bërë thirrje të gjitha palëve që të jenë serioze në këtë proces, duke theksuar se nëse ka vullnet politik, çdo zgjidhje është e mundshme.