Policia e Kosovës ka zbuluar dhe konfiskuar mallra të kontrabanduara në vlerë rreth 30 mijë euro gjatë një aksioni të realizuar në Pejë.
Operacioni është zhvilluar nga njësitet e Drejtorisë për Hetimin e Krimeve Ekonomike dhe Korrupsionit, në bashkëpunim me Administratën Tatimore të Kosovës dhe Njësitin Anti-Kontrabandë të Doganave të Kosovës, bazuar në urdhëresa të Gjykatës Themelore në Pejë.
Sipas njoftimit, gjatë kontrollit në një subjekt afarist janë konfiskuar qindra produkte të ndryshme, përfshirë 684 cigare elektrike, 1400 gram duhan të grirë, 94 shije për cigare elektronike, 1016 filtra për cigare elektronike, 8 kilogramë shije për shisha, 6675 cigare të llojeve të ndryshme dhe 94 cigare puro.
Ndërkaq, në shtëpinë e të dyshuarve janë gjetur dhe sekuestruar 38 mijë e 200 cigare të kontrabanduara, 36 mijë e 200 filtra për cigare elektronike si dhe 853 filtra për shisha elektrike.
Sipas vlerësimit preliminar të Doganës së Kosovës, vlera e përgjithshme e mallrave të konfiskuara arrin rreth 30 mijë euro.
Me vendim të prokurorit kujdestar, ndaj dy personave të dyshuar do të ngrihet kallëzim penal për veprat “Tregtia e ndaluar” dhe “Kontrabandimi i mallrave”, ndërsa pritet të ndërmerren edhe veprime të tjera ligjore.