Kryediplomati i Kosovës, Glauk Konjufca, gjatë fjalës së tij në Këshillin e Sigurimit (KS) të Organizatës së Kombeve të Bashkuara (OKB), i bëri thirrje Serbisë që të njohë pavarësinë e Kosovës dhe të mos pengojë integrimin e rajonit në strukturat euroatlantike.
“I bëjmë thirrje Serbisë që të ballafaqohet me realitetin e vet dhe ta njohë Kosovën si shtet i pavarur dhe sovran, duke mos e mbajtur peng gjithë shoqërinë e rajonin të një hegjemonie të tillë”, u shpreh ai.
Konjufca theksoi se Kosova ka zhvilluar procese zgjedhore të rregullta dhe ka ndërtuar institucione të pavarura e demokratike që garantojnë stabilitetin në vend. Ai përmendi gjithashtu ndërhyrjet e Serbisë në zgjedhjet në Kosovë.
“Beogradi ka vazhduar të luajë rolin e vet destruktiv duke u përpjekur që të ndërhyjë në zgjedhje duke u përpjekur për ta mbështetur Listën Srpska në zgjedhjet në Kosovë. Ne kemi penguar ndërhyrjet e tilla të huaja dhe kemi arritur ta ruajmë integritetin”, tha ai.
Më tej, kryediplomati kosovar deklaroi se Serbia mbetet pengesë për paqen dhe normalizimin e marrëdhënieve mes dy vendeve.
“Jemi shtet paqedashës, asnjëherë s’kemi ndërhyrë në shtetet e tjera apo në politikat e tyre të brendshme. Përkundër agresionit të Serbisë dhe kërcënimeve të tyre hibride ndaj shoqërisë dhe institucioneve të saj, Kosova mbetet e gatshme të normalizojë marrëdhëniet e veta ndërshtetërore, fqinjësore. Megjithatë, pengesa ndaj paqes dhe normalizimit të marrëdhënieve mbetet Serbia që as nuk është e interesuar të normalizojë marrëdhëniet me Kosovën e as t’i bashkohet BE-së. Ata përpiqen t’i mohojnë rajonit tonë stabilitetin e integrimin e plotë këtij rajoni në struktura euroatlantike”, u shpreh ai.
Konjufca hodhi poshtë edhe pretendimet e kryediplomatit serb Marko Gjurić për shkelje të të drejtave të serbëve në Kosovë, duke theksuar se vendi ka ndër mekanizmat më të avancuar në Evropë për mbrojtjen e pakicave.