Në nisje të vizitës së tij zyrtare në Londër kryeministri i Kosovës, Albin Kurti, është takuar me Sekretaren për Punë të Jashtme të Mbretërisë së Bashkuar, Yvette Cooper.
Gjatë takimit, Kurti shprehu mirënjohje për mbështetjen e vazhdueshme të Mbretërisë së Bashkuar ndaj Kosovës, duke theksuar marrëdhëniet e forta mes dy vendeve, të ndërtuara mbi vlera demokratike dhe angazhim të përbashkët për sigurinë dhe prosperitetin në Evropë. Ai e cilësoi Mbretërinë e Bashkuar si partner strategjik kyç dhe u zotua për thellimin e bashkëpunimit.
Sipas njoftimit të ZKM-së, kryeministri informoi Cooper edhe për, siç u tha, kërcënimet e vazhdueshme nga Serbia, të mbështetura nga Rusia, duke përmendur operimin e 48 bazave të përparme ushtarake pranë kufirit me Kosovën.
Sa i përket dialogut me Serbinë, Kurti përsëriti tri parakushtet për vazhdimin e procesit: dorëzimin e Milan Radojiçiqit, tërheqjen e letrës së ish-kryeministres Ana Bërnabiq dhe nënshkrimin e Marrëveshjes së Ohrit. Ai theksoi se Kosova mbetet e përkushtuar për normalizim të plotë të marrëdhënieve përmes një marrëveshjeje ligjërisht obliguese, të bazuar në njohje reciproke.
Në komunikatë theksohet gjithashtu se Kosova konsiderohet partnere e besueshme për Mbretërinë e Bashkuar dhe për sigurinë në rajon.
Kurti nënvizoi se anëtarësimi i Kosovës në NATO dhe Bashkimin Evropian mbetet objektiv strategjik, duke e cilësuar atë si thelbësor për sigurinë, stabilitetin dhe zhvillimin afatgjatë të vendit.