Agjencia e Ushqimit dhe Veterinarisë ka bërë të ditur se është konfirmuar rasti i parë i sëmundjes Lija e Deleve/Dhive (Sheeppox/Goatpox) në Kosovë.
Sipas njoftimit të AUV-it, rasti është identifikuar në fshatin Sazli, në Komunën e Ferizajt, pas analizave laboratorike të kryera në Laboratorin e Ushqimit dhe Veterinarisë.
AUV ka vendosur masa të përgjithshme për kontrollin dhe parandalimin e përhapjes së sëmundjes, të cilat kanë hyrë në fuqi sot. Masat zbatohen aktualisht në rajonin e Ferizajt dhe Gjilanit, por mund të ndryshojnë në varësi të zhvillimeve epidemiologjike.
Sipas njoftimit, bëhet fjalë për një sëmundje virale shumë ngjitëse që prek delet dhe dhitë, me pasoja të mëdha ekonomike për fermerët, por që nuk përbën rrezik për shëndetin e njerëzve.