Sulmuesi i përfaqësueses së Kosovës, Vedat Muriqi, ka marrë një mesazh të veçantë nga një prej legjendave të futbollit botëror, Samuel Eto’o.
Ylli dardan ka arritur të thyejë rekordin e Eto’o-s për numrin më të madh të golave të shënuar me fanellën e RCD Mallorca, duke shkruar kështu historinë me klubin spanjoll.
Pas këtij suksesi të madh, ish-sulmuesi kamerunas e ka uruar Muriqin përmes një videomesazhi emocionues, i cili erdhi si një surprizë për futbollistin kosovar. Në mesazhin e tij, Eto’o vlerësoi arritjen e Muriqit dhe i dëshiroi suksese të mëtejshme në karrierë.
Videoja e këtij momenti është publikuar nga RCD Mallorca në rrjetin social Facebook, duke tërhequr vëmendjen e tifozëve dhe mediave sportive.
Ky rekord përbën një tjetër dëshmi të formës së shkëlqyer që po kalon Muriqi, i cili vazhdon të jetë një nga lojtarët kyç të Mallorcas dhe krenari për futbollin kosovar.