Kryediplomati turk, Hakan Fidan, ka deklaruar se si Irani ashtu edhe Shtetet e Bashkuara të Amerikës kanë vullnet për të vazhduar bisedimet për t’i dhënë fund luftës, por mbeten një sërë pikash mosmarrëveshjeje.
“Ata tani janë në një fazë kritike të negociatave. Ajo që është pozitive është se vazhdojnë negociatat dhe kanë vullnet për t’i vazhduar ato,” tha ai gjatë një konference për shtyp të transmetuar nga transmetuesi publik turk TRT World.
Fidan tha se është takuar me përfaqësues të Shteteve të Bashkuara, Iranit dhe Pakistanit, i cili po ndërmjetëson bisedimet, për të diskutuar se si Turqia mund t’i mbështesë ato, shkruan CNN, transmeton Dukagjini.
Fidan shtoi se armëpushimi dyjavor midis Iranit dhe Shteteve të Bashkuara që pritet të skadojë të martën duhet të zgjatet për t’u dhënë më shumë kohë palëve që të zgjidhin çështjet e mbetura.
“Ata kanë një listë të gjatë problemesh për të zgjidhur dhe unë jam optimist se do të jenë në gjendje t’i zgjidhin ato,” shtoi ai.