Pro-rus dhe ish-presidenti i Bullgarisë, Rumen Radev, ka dalë fitues i madh në zgjedhjet parlamentare, duke shënuar një nga rezultatet më të forta të një partie të vetme në dekada dhe duke hapur rrugën për fundin e paqëndrueshmërisë politike në vend.
Sipas rezultateve zyrtare me 60% të votave të numëruara, partia e tij “Bullgaria Progresive” ka marrë 44.6% të votave, duke lënë shumë pas koalicionin pro-evropian “Vazhdojmë me Ndryshimin – Bullgaria Demokratike” me 14.2% dhe partinë GERB të ish-kryeministrit Boyko Borissov me 13%.
“Është një fitore e shpresës ndaj mosbesimit, e lirisë ndaj frikës dhe e moralit,” deklaroi Radev pas zgjedhjeve, një ditë para shpalljes së rezultateve përfundimtare.
Radev, i cili më herët ka qenë president dhe pilot luftarak, dha dorëheqje në janar për t’u futur në garën parlamentare, pas protestave masive që rrëzuan qeverinë e mëparshme në dhjetor. Fushata e tij u fokusua në pakënaqësinë e qytetarëve me korrupsionin dhe partitë tradicionale që kanë dominuar politikën për vite, raporton Reuters.
Ai ka mbajtur qëndrime euroskeptike, është kundër ndihmës ushtarake për Ukrainën dhe ka kërkuar përmirësim të raporteve me Rusinë, përfshirë rifillimin e furnizimeve me gaz dhe naftë ruse në Evropë.
Megjithatë, Radev ka lënë të hapur mundësinë e bashkëpunimit me forca pro-evropiane për reforma në drejtësi dhe ka theksuar se Bullgaria do të vazhdojë rrugën evropiane.
Bullgaria, anëtare e NATO-s dhe BE-së, ka kaluar vite të tëra me qeveri të brishta dhe zgjedhje të përsëritura, ndërsa qytetarët janë përballur me rritje të kostos së jetesës dhe pakënaqësi ndaj politikave fiskale.