Analisti politik, Ardian Bytyqi, ka deklaruar se diskutimet për emrat e mundshëm për president të vendit janë ende në fazë spekulimesh, pasi nuk ka asnjë marrëveshje apo emër zyrtar të konfirmuar.
Bytyqi, në “FIVE” në Dukagjin, u shpreh se ditëve të fundit janë duke qarkulluar dy-tre emra përfshirë komandantin e Forcës së Sigurisë së Kosovës, Bashkim Jashari, si dhe ish-presidentin Fatmir Sejdiu.
Megjithatë, Bytyqi theksoi se këto mbeten vetëm spekulime derisa të mos ketë një emër të dakorduar.
Bytyqi gjithashtu përmendi edhe mundësinë e përfshirjes së figurave nga familja Jashari, duke theksuar se në rrethanat aktuale çdo qytetarë do të duhej të gëzohej nëse një emër nga kjo familje do të ishte president konsensual.
“Ka pak lëvizje ku po qarkullojnë dy-tre emra. Po ashtu bëri bujë takimi i kryeministrit Kurti me komandantin e FSK-së, Bashkim Jasharin, po flitet edhe për emrin e ish-presidentit, Fatmir Sejdiu. Por këto mbeten vetëm spekulime derisa nuk e kemi një emër. Ndoshta nuk do të ishte mirë që në këto tri ditët e fundit që të flitet për një vëlla tjetër nga Familja Jashari – ne e kemi parë më herët qëndrimin e familjes Jashari nga vetë Murat Jashari që nuk duan të përfshihen në këto procese si një emër për president konsensual. Tash kur Kurti takohet me komandantin Jashari nuk do të thotë se janë ulur për të folur për presidentin e vendit dhe takime të tilla duhet të jenë normale. Unë e kam thënë edhe më herë se secili qytetarë i Kosovës në këto rrethana që ne jemi si shtet do të duhej t’i gëzohej ardhjes së njërit emër nga Familja Jashari për president. Prandaj, këtu nuk bën përjashtim as Murat Jashari e as Bashkim Jashari – këta emra do të duhej të ishin emblema e shtetit të Kosovës në rrethanat që ne jemi”, u shpreh Bytyqi.