Presidenti amerikan, Donald Trump, ka deklaruar se së shpejti do të shqyrtojë një plan të ri nga Irani, por shtoi se “nuk mund ta imagjinojë që do të jetë i pranueshëm”.
“Do ta shqyrtoj së shpejti planin që Irani sapo na ka dërguar, por nuk mund të imagjinoj që do të jetë i pranueshëm, pasi ata ende nuk kanë paguar një çmim mjaftueshëm të madh për atë që i kanë bërë njerëzimit dhe botës gjatë 47 viteve të fundit,” shkroi Trump në Truth Social, shkruan CNN, transmeton Dukagjini.
“Më treguan për konceptin e marrëveshjes. Tani do të më japin formulimin e saktë,” tha ai, pasi mediat shtetërore raportuan se Irani i kishte dërguar SHBA-së një propozim me 14 pika.
Trump gjithashtu kundërshtoi deklaratat që kishte bërë të premten në mbrëmje, kur kishte thënë: “Sinqerisht, ndoshta është më mirë të mos bëjmë fare marrëveshje. Doni të dini të vërtetën? Sepse nuk mund ta lejojmë këtë gjë të vazhdojë.”
“Nuk e kam thënë këtë,” tha Trump të shtunën.
“Kam thënë se nëse do të largoheshim tani, do t’u duheshin 20 vite për t’u rimëkëmbur. Por ne nuk po largohemi tani,” u tha ai gazetarëve përpara se të nisej nga Palm Beach drejt Miami-t.