Edi Rama ka deklaruar se Shqipëria ndodhet më afër se kurrë anëtarësimit në Bashkimin Evropian, duke theksuar se objektivi për integrim tashmë është i arritshëm përmes angazhimit dhe vullnetit politik.
Duke folur në podcastin e tij këtë të diel, Rama tha se vendi ka hyrë në një fazë kyçe të procesit integrues, ndërsa Komisioni Evropian dhe shtetet anëtare po shqyrtojnë raportin e progresit për Shqipërinë.
Sipas tij, raporti i Komisionit Evropian vlerëson se Shqipëria ka përmbushur të gjitha detyrimet e kërkuara dhe është e gatshme të kalojë në fazën e mbylljes së kapitujve të negociatave.
Kryeministri shqiptar tha se avancimi i negociatave dhe hapja e kapitujve me ritëm të shpejtë janë rezultat i reformave të vazhdueshme dhe transformimeve në sektorë kyç të shtetit.
Ai përmendi reformën në drejtësi, transformimin e administratës publike, digjitalizimin e shërbimeve, modernizimin e ekonomisë, si dhe investimet në energji dhe infrastrukturë, duke i cilësuar ato si pjesë të ndërtimit të “shtetit evropian të shqiptarëve”.
Rama theksoi se për Shqipërinë, 9 Maji nuk është vetëm Dita e Evropës, por edhe simbol i afrimit drejt objektivit historik të integrimit në Bashkimin Evropian.
“Majën tani e kemi të arritshme me angazhim dhe vullnet”, u shpreh Rama.