Kryetari i Partisë Demokratike të Kosovës (PDK), Bedri Hamza, ka prezantuar listën e kandidatëve të kësaj partie për zgjedhjet e 7 qershorit, duke e cilësuar atë si një përbërje të profesionistëve të dëshmuar në punë, angazhim publik dhe shërbim ndaj qytetarëve.
Hamza tha se lista e PDK-së përfaqëson një kombinim mes përvojës dhe energjisë së re, duke theksuar se mbi 50 për qind e kandidatëve janë prurje të reja në politikë, si pjesë e synimit për t’u dhënë hapësirë kuadrove të rinj.
“Kjo është lista jonë. Profesionistë të dëshmuar në punë, në angazhim publik dhe në shërbim ndaj qytetarëve.
Në këtë listë ka energji të re, por edhe përvojë. Njerëz që besojnë se Kosova meriton më shumë dhe më mirë. Mbi 50% e listës së kandidatëve janë prurje të reja, si pjesë e përkushtimit të PDK-së për t’u dhënë hapësirë kuadrove të rinj.
Përveç listës, në ditët në vijim PDK do ta prezantojë edhe programin më serioz dhe më të përgjegjshëm për shtetin dhe qytetarët.
Më 7 qershor, ju do ta keni edhe një mundësi për të vendosur për të ardhmen e vendit, ndërsa thirrja ime është e përzemërt: Besoni në Kosovë!”, ka shkruar Hamza.
