Irani ka deklaruar se është arritur përparim në bisedimet me Shtetet e Bashkuara, por ka mohuar se një marrëveshje përfundimtare është afër.
Zëdhënësi i Ministrisë së Jashtme iraniane, Esmail Baqai, tha të hënën në Teheran se palët kanë arritur mirëkuptim për një pjesë të madhe të çështjeve që po diskutohen.
“Është e saktë të thuhet se kemi arritur përfundime për një pjesë të madhe të çështjeve në diskutim, por të thuhet se nënshkrimi i një marrëveshjeje është i afërt, askush nuk mund ta pretendojë këtë”, deklaroi ai.
Komentet e tij erdhën pasi sekretari amerikan i Shtetit, Marco Rubio, tha se një marrëveshje mund të arrihet që të hënën.
Sipas raportimeve, memorandumi i mirëkuptimit parashikon zgjatjen e armëpushimit edhe për 60 ditë, rihapjen e Ngushticës së Hormuzit dhe vazhdimin e negociatave për programin bërthamor të Iranit.
Presidenti amerikan Donald Trump ka deklaruar se palët janë afër një marrëveshjeje, megjithëse më pas ka thënë se i ka udhëzuar negociatorët amerikanë të mos nxitojnë.
Ndërkohë, mediat amerikane raportojnë se udhëheqësi suprem iranian, Mojtaba Khamenei, ndodhet në një vend të fshehtë pas sulmeve izraelite, gjë që po e vështirëson komunikimin dhe po ngadalëson procesin e negociatave.
Raportohet se marrëveshja e mundshme nuk do të jetë përfundimtare, pasi çështje kyçe si lehtësimi i sanksioneve, lirimi i fondeve iraniane të ngrira dhe kufizimet mbi programin bërthamor do të diskutohen më vonë.
Lajmet për përparim në negociata kanë ndikuar pozitivisht në tregjet ndërkombëtare, me rënie të çmimeve të naftës dhe rritje të bursave aziatike.
Megjithatë, marrëveshja ka shkaktuar përçarje edhe brenda republikanëve në SHBA, ku disa senatorë e kanë kritikuar si tepër të butë ndaj Iranit.