Policia ka bërë të ditur se ka zhvilluar sot operacion në fshatin Lucka Reka, në komunën e Zubin Potokut, ku ka sekuestruar një armë zjarri dhe një sasi të konsiderueshme municioni.
Sipas njoftimit të Policisë, aksioni u realizua si rezultat i bashkëpunimit të vazhdueshëm me qytetarët, të cilët kishin njoftuar se në një shtëpi të pabanuar në këtë fshat mund të fshiheshin armë dhe mjete të tjera ilegale, njofton Dukagjini.
Pas kontrollit të lokacionit, zyrtarët policorë gjetën dhe sekuestruan një armë të gjatë gjysmëautomatike, 392 fishekë të kalibrit 7.62 mm, 123 fishekë të kalibrit 7.9 mm, 15 fishekë të pushkës së gjuetisë, 11 fishekë të pushkës së gjatë, tre fishekë manovrues, 18 fishekë të armës së shkurtër, dy fishekë të armës së gjatë, gjashtë gëzhoja të llojeve të ndryshme, si dhe një bajonetë.
Lidhur me rastin është njoftuar Prokurori i Shtetit, i cili ka urdhëruar inicimin e procedurës penale për veprën “Mbajtje në pronësi, kontroll ose posedim të paautorizuar të armëve”.
Policia bëri të ditur se deri më tani nuk është arrestuar asnjë person, ndërsa hetimet për identifikimin e të dyshuarve dhe zbardhjen e plotë të rastit janë duke vazhduar.