Kryetari i Lëvizjes Vetëvendosje, Albin Kurti, e ka vlerësuar si konstruktiv takimin me kryetarin e Partisë Demokratike të Kosovës (PDK), Bedri Hamza, në kuadër të konsultimeve për formimin e institucioneve të reja.
Pas takimit, Kurti tha se shpreson që fryma e bashkëpunimit të vazhdojë edhe në takimet e tjera me liderët politikë, me qëllim që institucionet të konstituohen brenda afateve kushtetuese.
“Me kryetarin Hamza u takuam së pari në këtë raund të këtyre takimeve meqenëse është edhe numri i dytë me numër të deputetëve pas Lëvizjes Vetëvendosje. E falënderoj kryetarin Hamza. Takimi ishte konstruktiv në atmosferë të vullnetit dhe interesimit për t’i dhënë institucione të reja në përputhje me vullnetin e popullit. S’kemi ndonjë rezultat konkret, të arritur që do të mund ta ndaja me publikun”.
Ai shtoi se pret që edhe takimi i pasdites me kryetarin e Lidhjes Demokratike të Kosovës (LDK) të zhvillohet në të njëjtën frymë, ndërsa kritikoi Aleancën për refuzimin e ftesës për takim.
Duke folur për zgjedhjen e presidentit të ardhshëm të vendit, Kurti tha se kjo është një përgjegjësi që u takon të gjitha partive parlamentare, pasi zgjedhja e kreut të shtetit kërkon një konsensus më të gjerë politik.
Sipas tij, pikënisja duhet të jetë gjetja e një figure që nuk i përket asnjë subjekti politik dhe që gëzon integritet profesional e kombëtar.
“Vullneti është aty, atmosfera konstruktive duhet të vijojë të mbizotërojë. Duhet të jemi optimistë”.