Prokuroria Themelore në Ferizaj ka njoftuar se ka ndaluar për 24 orë një person të mitur, i dyshuar për përfshirje në një sulm me thikë ndaj dy personave në qytetin e Ferizajt.
Sipas njoftimit të Prokurorisë, ndaj të miturit është marrë vendim për ndalim nën dyshimin për kryerjen e veprave penale “Vrasja në tentativë” dhe “Sulmi ndaj personit zyrtar”.
Rasti ka ndodhur mëngjesin e 10 korrikut 2026, rreth orës 07:53, në rrugën “Dëshmorët e Kombit”, në afërsi të Postës Qendrore në Ferizaj.
Sipas informatave fillestare, i dyshuari ka sulmuar me një mjet të mprehtë, përkatësisht thikë, dy persona të tjerë. Pas incidentit, ai dyshohet se është larguar nga vendi i ngjarjes.
Policia e Kosovës, pas ndërmarrjes së veprimeve hetimore, ka arritur ta lokalizojë të dyshuarin, i cili më pas është ndaluar me vendim të Prokurorit të Shtetit.
Prokuroria Themelore në Ferizaj ka bërë të ditur se do të vazhdojë me ndërmarrjen e veprimeve të mëtejshme ligjore për zbardhjen e plotë të rrethanave të rastit.
Hetimet për këtë ngjarje janë duke vazhduar.