Gjykata Themelore në Pejë ka vendosur të rihapë shqyrtimin gjyqësor në rastin e vrasjes së trefishtë në Gllogjan të Deçanit, ku të akuzuar janë Halil Mehmetaj, Kreshnik Mehmetaj dhe Kastriot Mehmetaj.
Vendimi për rihapjen e procesit është marrë pasi Prokuroria, gjatë fjalës përfundimtare, iu është referuar një video-incizimi të Kreshnik Mehmetajt duke gjuajtur me armë, si dhe disa provave balistike, të cilat, sipas gjykatës, nuk ishin paraqitur dhe administruar më herët gjatë shqyrtimit gjyqësor.
Sipas vendimit, paraqitja e këtyre provave në fazën përfundimtare të procesit u ka pamundësuar palës mbrojtëse që t’i shqyrtojë dhe kundërshtojë ato në mënyrë të plotë, në përputhje me të drejtat procedurale të të akuzuarve.
Tre të pandehurit akuzohen për vrasjen e tre personave më 26 nëntor 2021 në fshatin Gllogjan të Komunës së Deçanit. Sipas aktakuzës së Prokurorisë Themelore në Pejë, ata dyshohet se, të shtyrë nga hakmarrja e paskrupullt dhe në bashkëpunim me njëri-tjetrin, kanë shtënë me armë zjarri në drejtim të një autobusi në rrugën “Ismajl Haradinaj”.
Nga sulmi mbetën të vrarë shoferi i autobusit G.Gj., si dhe dy nxënës 17-vjeçarë, L.H. dhe G.M.
Në seancën fillestare të mbajtur më 21 qershor 2023, Halil, Kreshnik dhe Kastriot Mehmetaj ishin deklaruar të pafajshëm për akuzat që rëndojnë ndaj tyre.