Para se të takoheshin sy me sy, Albin Kurti e Bedri Hamza, pritshmëritë i kishin të mëdha.
“Pres një takim kontstruktiv në mënyrë që të nisim formimin e institucioneve të reja”, deklaroi kreu i Vetëvendosjes, Albin Kurti.
“Uroj dhe besoj që me pasë sukses, me pasë progres, vendi me pas institucione, me pas stabilitet institucional edhe me pas progres e përparim”, u shpreh Hamza.
Me këtë qasje hynë në takimin që do zgjaste 1 orë e 15 minuta.
Por, kur dolën jashtë, kumtuan që nuk arritën kurrfarë marrëveshje, ndonëse bisedën e konsideruan konstruktive.
I pari, u deklarua Bedri Hamza, duke konfirmuar pozicionin politik, tash e tutje.
“…qëndrimi jonë është që Partia Demokratike e Kosovës për këtë mandat është parti në opozitë. Dhe ne i dëshirojmë sukses zotit Kurti dhe të gjithë atyre që takohen, bisedojnë, t’i japin vendit institucione”, tha Hamza.
Por, përkundër këtij qëndrimi të PDK-së, Kurti u shpreh i hapur që në vazhdim mund të arrihet marrëveshje për Presidentin, për çka bëri edhe përllogaritje të votave.
“Le t’i mbledhim me shpejtësi, 93 deputetë, pra 53 Vetëvendosja, 22 PDK-ja dhe 18 LDK-ja, ne kemi numrin e mjaftueshëm të deputetëve që të konstituojmë të gjitha institucionet e legjislaturës së 11-të”, u shpreh Kurti.
Kështu, edhe e përshkroi Presidentin potencial, e përgjegjësi për këtë tha se kanë të gjitha partitë në Kuvend.
“… një figurë konsensuale, dikush i asnjë partie, përtej polemikave të skenës aktuale, që i ka vlerat e dëshmuar kombëtare e profesionale dhe të jetë shprehje e unitetit… Për qeverisje përgjegjësia bie mbi ne, por për zgjedhjen e presidentin të gjithë kemi përgjegjësi”, tha ai.
Presidentja në detyrë, Albulena Haxhiu ende nuk ka caktuar datën për seancë konstituive derisa sot është dita e dytë e afatit 30 ditor për këtë.