Ministria e Infrastrukturës dhe Transportit ka njoftuar se sot, më 29 korrik, do të hyjnë në fuqi kufizime të përkohshme të qarkullimit për automjetet e transportit të mallrave me masë totale mbi 20 tonë në autoudhët e Kosovës.
Sipas ministrisë, kufizimi do të zbatohet nga ora 11:00 deri në 17:30, për shkak të temperaturave të larta që parashikohet të arrijnë ose të tejkalojnë 32 gradë Celsius.
Në rrugët nacionale, rajonale dhe lidhëse, qarkullimi do të zhvillohet normalisht dhe pa kufizime.
Nga ky vendim përjashtohen automjetet e organeve të rendit dhe sigurisë publike, shërbimet emergjente dhe institucionet shëndetësore.
Ministria u ka bërë thirrje operatorëve ekonomikë dhe drejtuesve të mjeteve që të respektojnë kufizimet e vendosura dhe të planifikojnë qarkullimin në përputhje me orarin e përcaktuar.