Një person ka pësuar lëndime si pasojë e shkrepjes aksidentale të një arme zjarri në fshatin Tërpezë të Vitisë.
Sipas raportit 24-orësh të Policisë së Kosovës, rasti ka ndodhur më 31 korrik 2026, rreth orës 10:30.
“ I dyshuari mashkull kosovar, ka pësuar lëndime, pasi dyshohet se të njëjtit i ka shkrepur aksidentalisht pistoleta dhe i ka shkaktuar lëndime në dorë”, thuhet në raportin policor.
I dyshuari është dërguar për tretman mjekësor në Spitalin Rajonal në Gjilan.
Policia ka bërë të ditur se gjatë kontrollit në shtëpinë e të dyshuarit ka gjetur dhe konfiskuar një pistoletë me karikator, tre fishekë dhe një gëzhojë, të cilat dyshohet se janë përdorur në rast.
“Njësitet policore në shtëpinë e të dyshuarit kanë gjetur dhe konfiskuar pistoletën me karikator, 3-fishekë dhe 1-gëzhojë”, thuhet në njoftimin e Policisë.
Pas tretmanit mjekësor dhe intervistimit, i dyshuari, në konsultim me prokurorin e shtetit, është liruar në procedurë të rregullt.
Rasti është iniciuar si shkaktim i rrezikut të përgjithshëm.