Një zonë e thellë malore në fshatin Jabukë të Zubin Potokut u shndërrua në lokacion të dyshimtë.
Prokuroria Speciale kishte njoftuar një ditë më parë se pikërisht në këtë lokacion dyshohet se ndodhet një varrezë masive me mbetje mortore, që besohet se i përkasin periudhës së luftës së fundit në Kosovë.
Rruga deri tek vendi ishte e vështirë për kalim.
E sapo afroheshe pranë tij, në terren të hënën tashmë ishin pozicionuar ekipe të Policisë së Kosovës dhe të EULEX-it.
Pak orë më vonë, hyrja drejt zonës së dyshuar u bllokua me shirita sigurie.
Nga ai moment, askush përveç hetuesve policor dhe ekipeve të autorizuara nuk u lejua të kalonte.
Në vendngjarje mbërriti ministri në detyrë i Punëve të Brendshme, Xhelal Sveçla, i shoqëruar nga ministri në detyrë për Administrimin e Pushtetit Lokal, Elbert Krasniqi.
Pas më shumë se 3 orësh qëndrim tek vendi ku kryheshin gërmimet, ai doli para mediave, ku tregoi se janë gjetur mbetje mortore të katër viktimave.
“Deri tash janë zbuluar të paktën 4 trupa, të cilët pas ekzekutimit janë hedhur në një gropë qereçi”, deklaroi Xhelal Sveçla, ministër në detyrë i Punëve të Brendshme.
Sveçla akuzoi Serbinë për krimet e kryera gjatë luftës në Kosovë dhe tha se ka pasur përpjekje të vazhdueshme për fshehjen e tyre.
“Hetimet për kriminelët që kanë shkaktuar këtë krim do të vazhdojnë. Ne nuk do të ndalemi derisa nuk zbulojmë edhe të pagjeturit e fundit, por po ashtu nuk do të ndalemi derisa secili kriminel të paguajë për krimet që kanë shkaktuar, posaçërisht për këto krime ku gjatë luftës kanë ekzekutuar njerëz të pafajshëm dhe pastaj kanë punuar që ky krim të fshihet” tha Xhelal Sveçla, ministër në detyrë i Punëve të Brendshme.
Për rastin ka reaguar edhe kryeprokurori i Shtetit Zejnulla Gashi, i cili tha se zbulimi i varrezave masive është një përpjekje dhe angazhim shtetëorë për zbardhjen e së vërtetës dhe vendosjen e drejtësisë.
Ndërsa sipas Prokurorisë Speciale, i arrestuari i datës 2 gusht J.R, i cili dyshohet për përfshirje në krime lufte kundër popullatës civile,e për të cilin Gjykata Themelore në Prishtinë e ka vendosur masaën e paraburgimit prej një muaji.
Ditë më parë një varrezë masive ishte zbuluar në fshatin Kalludër e vogël, po në Zubin Potok.