Dy persona janë plagosur me thikë të martën në mëngjes në rrugën “Mbretëresha Teutë” në Pejë, ndërsa të dyshuarit janë larguar nga vendi i ngjarjes dhe ndodhen në arrati.
Zëdhënësi i Policisë për Rajonin e Pejës, Driton Rugova, tha se rasti është raportuar rreth orës 08:45.
“Sot rreth orës 08:45, Policia është njoftuar për një rast që ka ndodhur në rrugën ‘Mbretëresha Teutë’. Njësitë policore kanë dalë menjëherë në vendin e ngjarjes, ku është konstatuar se dy persona janë therur me mjet të mprehtë (thikë) nga persona të dyshuar”, deklaroi Rugova.
Sipas tij, të lënduarit janë dërguar në Spitalin Rajonal të Pejës për trajtim mjekësor.
“Sipas mjekëve, gjendja e tyre është stabile, ndërsa të dyshuarit janë larguar nga vendi i ngjarjes dhe janë në arrati. Policia është duke punuar intensivisht për identifikimin dhe kapjen e tyre”, tha Rugova.