Komuna e Podujevës ka shpallur gjendje emergjente për shkak të situatës së rënduar të krijuar nga mosgrumbullimi i rregullt i mbeturinave teksa vendimi është marrë nga Shtabi Emergjent për Mbrojtje dhe Shpëtim dhe do të jetë në fuqi nga 5 gushti deri më 5 nëntor 2026.
Siç bëhet e ditur në njoftimin e komunës, kryetari, Shpejtim Bulliqi, ka thënë se problemi me menaxhimin e mbeturinave ka vazhduar prej muajsh, si në qytet ashtu edhe në fshatrat e Podujevës.
Sipas tij, Kompania Rajonale e Mbeturinave “Pastrimi”, për shkak të pamundësisë për të ofruar shërbime në zonat rurale, më herët kishte kërkuar lirimin nga kjo përgjegjësi, e cila më pas iu transferua kompanisë private “Natyra”.
Bulliqi theksoi se tashmë vështirësi në ofrimin e shërbimeve po has edhe në qytet vetë KRM “Pastrimi”, duke shtuar se ka raste kur kompania operon vetëm me një kamion ose nuk ofron fare shërbim.
Ai nënvizoi se rritja e sasisë së mbeturinave, sidomos gjatë sezonit kur në vend ndodhen shumë mërgimtarë, paraqet rrezik për shëndetin publik.
Sipas kryetarit, vendimi për shpalljen e gjendjes emergjente është mbështetur në raportet e Drejtorisë së Shërbimeve Publike, Drejtorisë së Inspeksionit dhe Qendrës Kryesore të Mjekësisë Familjare, të cilat evidentojnë gjendjen e rënduar në terren.
Bulliqi deklaroi se Komuna ka ndihmuar vazhdimisht KRM “Pastrimi” me subvencione për të lehtësuar funksionimin e saj, por pa rezultat, duke akuzuar menaxhmentin qendror të ndërmarrjes për keqmenaxhim.
Ndërkohë, drejtori i Shërbimeve Publike, Mbrojtje dhe Shpëtim, Bahri Selimi, tha se situata ka bërë të domosdoshëm shpalljen e gjendjes emergjente.
Edhe drejtori i Inspeksionit, Shuajb Blakçori, si dhe anëtarët e tjerë të Shtabit Emergjent, u pajtuan se nevojitet një zgjidhje e shpejtë për tejkalimin e krizës.