Korporata Energjetike e Kosovës (KEK) ka njoftuar se Njësia A4 është ndalur në mënyrë të kontrolluar pas evidentimit të disa parregullsive teknike.
Sipas KEK-ut, ndalja është bërë në orën 00:00, si masë parandaluese dhe në përputhje me kërkesat e sigurisë teknike.
Qëllimi i ndaljes është mundësimi i kontrollit të pajisjeve dhe kryerja e ndërhyrjeve të nevojshme teknike.
“Ekipet profesionale janë angazhuar menjëherë në vlerësimin e gjendjes teknike, identifikimin e shkakut dhe ndërmarrjen e veprimeve të nevojshme për eliminimin e problemit”, thuhet në njoftimin e KEK-ut.
Korporata ka bërë të ditur se Njësia A4 do të rikthehet në operim pas përfundimit të kontrolleve dhe ndërhyrjeve teknike, si dhe pasi të konfirmohen kushtet e sigurta për funksionim.
KEK-u ka njoftuar se për zhvillimet e mëtejshme dhe kohën e rikthimit të njësisë në operim do ta informojë publikun me kohë.