Arrestimi i Fehim Salit nga Dragashi, nën dyshimet për spiunazh dhe bashkëpunim të gjatë me Agjencinë serbe të Inteligjencës (BIA), është një tjetër tregues i rëndësisë së punës së Agjencisë së Kosovës për Inteligjencë (AKI) dhe institucioneve të tjera të sigurisë në mbrojtjen e vendit nga veprimtaria e shërbimeve serbe të inteligjencës.
Sipas dyshimeve të bëra publike, Sali nuk ka vepruar thjesht si një kontakt i izoluar. Ai dyshohet se për një periudhë të gjatë ka bashkëpunuar me BIA-n, duke identifikuar dhe ofruar shtetas të Kosovës si objektiva të mundshëm rekrutimi për shërbimin serb. Një pjesë e kësaj veprimtarie dyshohet se është zhvilluar përmes favoreve dhe ndërmjetësimit për sigurimin e dokumenteve të Serbisë.
Një tjetër element që i jep peshë rastit lidhet me dyshimet se Sali ka kërkuar vazhdimisht të krijojë kontakte me politikanë lokalë nga komunitetet joshumicë në Kosovë, me synimin që përmes këtyre lidhjeve të siguronte informacione.
Këto dyshime ngrenë pikëpyetje se veprimtaria e tij mund të ketë shkuar përtej kontakteve me individë të caktuar, duke synuar krijimin e një rrjeti më të gjerë kontaktesh dhe burimesh informacioni në Kosovë.
Në këtë rast, rol të rëndësishëm ka pasur puna e AKI-së në zbulimin dhe dokumentimin e veprimtarisë së dyshuar. Operacioni, i zhvilluar në koordinim me Policinë e Kosovës dhe Prokurorinë Speciale, tregon për bashkëpunimin e institucioneve të sigurisë dhe drejtësisë në trajtimin e rasteve që lidhen me dyshimet për spiunazh.
Rasti i fundit tregon se AKI dhe institucionet e tjera të sigurisë së Kosovës po vazhdojnë të identifikojnë dhe godasin kanalet përmes të cilave shërbimet serbe të inteligjencës dyshohet se përpiqen të sigurojnë informacione dhe të shtrijnë ndikimin e tyre në Kosovë.
Operacioni njëherësh dërgon një sinjal të qartë se aktivitetet e dyshuara të shërbimeve serbe të inteligjencës në Kosovë po përcillen nga afër dhe po goditen nga institucionet e sigurisë.
Nën dyshimet për spiunazh arrestohet arsimtari Fehim Sali nga Dragashi