Deputeti i Lidhjes Demokratike të Kosovës (LDK), Avdullah Hoti, ka kritikuar vendimin që Kosova të eksportojë thëngjill në Maqedoninë e Veriut gjatë tri viteve të ardhshme.
Hoti ka thënë se Kosova, pas anulimit të projekteve të mëdha energjetike, po krenohet me eksportin e thëngjillit, ndërsa në anën tjetër importon energjinë elektrike të prodhuar nga ai thëngjill.
Sipas tij, kjo situatë është pasojë e mungesës së investimeve në kapacitete të reja dhe stabile energjetike gjatë viteve të fundit.
“Pas anulimit të projekteve madhore energjetike, Kosova tash krenohet me eksportin e thëngjillit. E në anën tjetër, importon energjinë e prodhuar nga ai thëngjill”, ka shkruar Hoti në Facebook.
Ai ka kritikuar edhe qeverisjen e Lëvizjes Vetëvendosje, duke thënë se gjatë gjashtë viteve në krye të Qeverisë nuk është ndërtuar asnjë kapacitet i ri stabil energjetik, qoftë me thëngjill apo gaz.
“Ky na qenka ‘tranzicioni energjetik’ i Kosovës nën udhëheqjen e VV-së”, ka shkruar Hoti.
Deputeti i LDK-së ka vlerësuar se eksportimi i lëndës së parë dhe importimi i produktit të gatshëm të prodhuar nga ajo lëndë e parë është tregues i dobësisë ekonomike dhe i mungesës së një vizioni për zhvillim.
“Kushdo që merr vesh në ekonomi, e di se vendi që eksporton lëndë të parë dhe importon produktin e gatshëm të prodhuar plotësisht nga ajo lëndë e parë, siç është rasti konkret, tregon varfërinë e vet ekonomike dhe mungesën e vizionit për zhvillim”, ka deklaruar ai.
Hoti e ka akuzuar Qeverinë për, siç është shprehur, “padije” dhe mungesë vizioni.
“Sa të padijshëm e sa të mbrapshtë”, ka shkruar Hoti.