Kompania shtetërore e Maqedonisë së Veriut, ESM, e cila ka lidhur marrëveshje me Korporatën Energjetike të Kosovës (KEK) për blerjen e qymyrit, do të jetë përgjegjëse që procesi i ngarkimit dhe transportit të qymyrit të mos pengojë operimet e KEK-ut.
Kështu përcaktohet në marrëveshjen për shitjen e qymyrit ndërmjet KEK-ut dhe ESM-së, dokumentin e së cilës e ka siguruar ekskluzivisht TV Dukagjini.
Sipas marrëveshjes, procesi i ngarkimit dhe transportit duhet të zhvillohet në përputhje me standardet e pranuara ndërkombëtare të operimit.
ESM-ja obligohet gjithashtu që gjatë këtyre aktiviteteve të mos shkaktojë probleme mjedisore.
Një nga përgjegjësitë e përcaktuara në kontratë është edhe mirëmbajtja e rrugëve, si brenda ashtu edhe jashtë hapësirave të KEK-ut, të cilat do të përdoren për transportin e qymyrit.
Blerësi duhet të kujdeset edhe për pastrimin e zonave dhe për çdo derdhje eventuale që mund të shkaktohet gjatë ngarkimit dhe transportit të qymyrit.
Sipas marrëveshjes, pas fillimit të punimeve, mirëmbajtja e rrugës nga frontet e qymyrit në fushën minerare deri te depoja do të jetë përgjegjësi e blerësit.
Kjo përfshin edhe shtrimin me zhavorr, kontrollin e pluhurit dhe spërkatjen e rrugëve, sipas nevojës.
“Blerësi duhet të sigurojë që procesi i ngarkimit dhe transportimit të qymyrit të mos ndërhyjë në proceset operative të KEK-ut dhe duhet të kryhet në përputhje me standardet ndërkombëtare të pranuara të operimit. Blerësi nuk duhet të shkaktojë probleme mjedisore dhe duhet të kryejë mirëmbajtjen e rrugëve (si brenda ashtu edhe jashtë KEK-ut), si dhe të pastrojë zonën dhe çdo derdhje të mundshme që rezulton nga ngarkimi dhe transportimi i qymyrit”, thuhet në marrëveshje.
Në këtë mënyrë, marrëveshja përcakton se përgjegjësia për organizimin e transportit dhe mirëmbajtjen e rrugëve të përdorura për largimin e qymyrit i mbetet kompanisë blerëse.
Marrëveshja mes KEK-ut dhe ESM-së është nënshkruar më 14 gusht 2026 dhe parasheh shitjen e rreth 3 milionë tonëve qymyr, me vlerë të përafërt prej 73.2 milionë eurosh.
