Kryetari i Organizatës së Veteranëve të Luftës së UÇK-së (OVL-UÇK), Hysni Gucati, ka bërë të ditur se kjo organizatë e mbështet Marshin për Liri, të organizuar nga platforma “Liria ka Emër”, i cili do të mbahet më 12 shtator në Prishtinë.
Pas mbledhjes së Kryesisë së OVL-UÇK-së, Gucati u ka bërë thirrje qytetarëve që t’i bashkohen protestës, e cila organizohet pak ditë para seancës përmbyllëse të procesit gjyqësor ndaj ish-krerëve të UÇK-së në Hagë.
“Është thirrur një protestë nga ‘Liria ka Emër’ më 12 shtator, ku ne si OVL bëjmë ftesë të gjithë qytetarëve që t’i bashkohen protestës. Ne do ta mbështesim protestën dhe bëjmë thirrje që të jetë një protestë sa më e madhe”, ka deklaruar Gucati.
Megjithatë, ai shprehi kritika ndaj organizuesve, që sipas tij e kanë ftuar kryeministrin në detyre, Albin Kurti.
“Nuk mund të jemi aty ku ata i bëjnë thirrje LVV-së, ku lideri i tyre në Kuvend e quan kriminel Hashim Thaçin dhe Kadri Veseli dhe i heq veteranët nga paga minimale”, tha ai.
Platforma “Liria ka Emër” ka njoftuar se marshi do të mbahet me moton “Kosova po pret”.
Marshi do të mbahet më 12 shtator, ndërsa më 16 shtator pritet të zhvillohet seanca përmbyllëse në Hagë për ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi.