Irani po zgjeron kapacitetet e tij mbrojtëse dhe po prodhon sisteme të reja ushtarake, pas dëmeve të shkaktuara në pajisjet e tij gjatë sulmeve SHBA-Izrael në ditët e para të luftës.
Komandanti i Forcave të Mbrojtjes Ajrore të Ushtrisë iraniane, Alireza Elhami, deklaroi se vendi ka nxjerrë mësime të rëndësishme nga përballja e fundit ushtarake dhe ka bërë ndryshime në taktika, prodhimin e sistemeve dhe mënyrën e vendosjes së tyre, shkruan CNN, transmeton Dukagjini.
“Ne fituam përvojë të vlefshme gjatë luftës së tretë të imponuar, e cila rezultoi e dobishme për sa i përket taktikave, prodhimit të sistemeve, si dhe vendosjes dhe pozicionimit të tyre”, deklaroi Elhami, sipas transmetuesit shtetëror iranian IRIB.
Sipas komandantit, bazuar në këtë përvojë, Irani po prodhon sisteme dhe pajisje të reja, duke u mbështetur tërësisht në njohuritë dhe ekspertizën vendase.
Irani kishte nisur më herët rikthimin e prodhimit të dronëve gjatë një armëpushimi gjashtëjavor në maj. Sipas dy burimeve të njohura me vlerësimet e inteligjencës amerikane, Teherani po përpiqej të rindërtonte me shpejtësi kapacitetet ushtarake të dëmtuara nga sulmet SHBA-Izrael.