Ratko Mladiqi, ish-komandanti i Ushtrisë së Republikës Srpska dhe kriminel lufte i dënuar me burgim të përjetshëm, ka vdekur sot në moshën 85-vjeçare në burgun e Hagës, raportojnë mediat serbe.
Mladiqi, me origjinë nga Kalinoviku, u dënua përfundimisht në qershor të vitit 2021 nga Gjykata Penale Ndërkombëtare për ish-Jugosllavinë në Hagë.
Ai u shpall fajtor për gjenocidin në Srebrenicë, përndjekjen, shfarosjen dhe vrasjen e popullsisë civile, dëbimin dhe akte të tjera çnjerëzore, si dhe për terrorizimin dhe sulmet e paligjshme ndaj Sarajevës dhe marrjen peng të pjesëtarëve të OKB-së.
Nga 11 pikat e aktakuzës, gjykata e shpalli fajtor për 10 prej tyre.
Mladiqi njihej me nofkën “Kasapi i Bosnjës” për shkak të rolit të tij në krimet e luftës në Bosnjë dhe Hercegovinë. Ai konsiderohet përgjegjës për krimet e kryera gjatë luftës, përfshirë vrasjen e më shumë se 8 mijë burrave dhe djemve boshnjakë në Srebrenicë në korrik të vitit 1995.
Ai vuante prej vitesh nga probleme të shumta shëndetësore. Gjatë javëve të fundit, familja e tij, si dhe autoritetet e Serbisë dhe të Republikës Srpska, kishin kërkuar transferimin e tij nga Haga në Beograd për trajtim dhe kujdes mjekësor.