Izraeli ka njoftuar të martën se do të mbyllë konsullatën britanike në Jerusalemin Lindor, në përgjigje të vendimit të Mbretërisë së Bashkuar, Francës dhe Kanadasë për të ndaluar importet nga vendbanimet izraelite në Bregun Perëndimor.
Ministri i Jashtëm izraelit, Gideon Saar, tha se Izraeli do të ndërmarrë një sërë masash ndaj Mbretërisë së Bashkuar. Sipas tij, Britania nuk do të marrë më pjesë në një mision koordinues të udhëhequr nga Shtetet e Bashkuara për Gazën, shkruan Reuters, transmeton Dukagjini.
Saar gjithashtu bëri të ditur se disa zyrtarë britanikë dhe shtetas të tjerë do të ndalohen të hyjnë në Izrael. Në mesin e personave të përmendur është edhe ish-lideri i Partisë Laburiste britanike, Jeremy Corbyn.
“Veprimi britanik është moralisht i shtrembëruar dhe përbën ndërhyrje të hapur në çështjet e një shteti sovran dhe në procesin e tij zgjedhor”, tha Saar.
Ai i cilësoi si “gënjeshtra të egra” deklaratat e sekretarit të Jashtëm britanik, Ed Miliband, lidhur me akuzat për spastrimin etnik të palestinezëve nga Izraeli.
Konsullata britanike në Jerusalemin Lindor është e akredituar pranë Autoritetit Palestinez në Bregun Perëndimor dhe luan një rol të rëndësishëm në marrëdhëniet britanike me palestinezët.
Saar tha se reagimi i Izraelit ishte koordinuar me kryeministrin Benjamin Netanyahu. Ai e akuzoi gjithashtu Britaninë për ndërhyrje në çështjet e brendshme të Izraelit, në një kohë kur vendi po përgatitet për zgjedhjet e ardhshme, të cilat pritet të mbahen në fund të tetorit.
Tensionet diplomatike u përshkallëzuan pasi Britania, Franca dhe Kanadaja njoftuan masa për të bllokuar importet nga vendbanimet izraelite në Bregun Perëndimor, të cilat pjesa më e madhe e komunitetit ndërkombëtar i konsideron të paligjshme sipas së drejtës ndërkombëtare.
Ndërkohë, ministrat e Jashtëm të nëntë vendeve të tjera evropiane, përfshirë Danimarkën, Norvegjinë, Poloninë, Spanjën dhe Suedinë, në një deklaratë të përbashkët rikonfirmuan mbështetjen për një zgjidhje të negociuar me dy shtete, ku një shtet palestinez do të bashkëjetonte në mënyrë paqësore me Izraelin.
“Së bashku, jemi të vendosur: zgjidhja me dy shtete duhet të mbrohet dhe ne do të ndërmarrim veprime në kërkim të një paqeje të drejtë dhe të qëndrueshme”, thanë ministrat.
Nga ana tjetër, Miliband tha se Britania nuk mund të mjaftohej më vetëm duke “denoncuar” padrejtësitë dhe vuajtjet, por duhej të ndërmerrte hapa konkretë për të kundërshtuar zgjerimin e vendbanimeve izraelite në Bregun Perëndimor.