Policia e Kosovës ka bërë të ditur se “Marshi për Liri” në Prishtinë është zhvilluar në mënyrë të qetë dhe pa incidente.
Sipas Policisë, masat e nevojshme për sigurinë, ruajtjen e rendit dhe qetësisë publike, si dhe mbarëvajtjen e marshit, ishin ndërmarrë paraprakisht nga zyrtarët policorë.
“Policia e Kosovës, ashtu siç kishte paralajmëruar me kohë ka ndërmarrë masat e nevojshme policore për ofrimin e sigurisë, ruajtjen e rendit e qetësisë publike si dhe mbarëvajtjen e marshit në aspektin e sigurisë, i cili kalojë në mënyrë të qetë dhe pa ndonjë incident”, thuhet në njoftim.
Policia ka falënderuar organizatorët dhe mijëra qytetarët pjesëmarrës për sjelljen e tyre gjatë marshit, duke vlerësuar respektimin e udhëzimeve të dhëna nga zyrtarët policorë.
“Policia e Kosovës, falënderon organizatorët dhe mijëra qytetarë pjesëmarrës për qytetarinë, kulturën dhe sjelljen paqësore të treguar, e në veçanti për respektimin e udhëzimeve të dhëna nga zyrtarët policorë gjatë pjesëmarrjes në marsh dhe qarkullimit në trafikun rrugor”, thuhet më tej.
Në fund, Policia ka theksuar se sjellja e përgjegjshme e qytetarëve dhe bashkëpunimi me zyrtarët policorë kanë ndikuar në mbarëvajtjen e sigurt të organizimit.
“Pjesëmarrja juaj, sjellja e përgjegjshme dhe respektimi i udhëzimeve policore kontribuan në mbarëvajtjen e qetë dhe të sigurt të marshit paqësor”, thuhet në njoftim.