Deputeti i Lidhjes Demokratike të Kosovës, Paris Guri, ka deklaruar se deputetët e LDK-së nuk do ta votojnë Qeverinë e udhëhequr nga Albin Kurti.
Guri ka folur para hyrjes në Kuvend, ku pritet të mbahet seanca plenare për formimin e Qeverisë së re.
“Secili deputet e ka vendin në Kuvend, për këtë arsye na ka votuar populli. Natyrisht, ne nuk votojmë për Qeverinë Kurti”, ka deklaruar Guri.
Seanca për zgjedhjen e Qeverisë është paraparë të nisë në ora 14:00.
Ai ka thënë se nuk është planifikuar një takim mes kreut të Lëvizjes Vetëvendosje, Albin Kurti dhe atij të LDK-së, Lumir Abdixhiku, për çështjen e presidentit.
Guri ka thënë se është e papërgjegjshme që njoftimi për seancën që mbahet në ora 14:00 ka ardhur rreth orës 13:45.
Guri ka thënë se sa i përket dakordimit mes Vetëvendosjes dhe LDK-së që Bekim Sejdiu të jetë kandidat për president konsensual, ajo marrëveshje është ende në fuqi.