Prokuroria Themelore në Pejë ka ngritur aktakuzë ndaj tre personave, I.A., F.T. dhe M.A., nën dyshimin për veprat penale që lidhen me shitjen dhe posedimin e narkotikëve, si dhe posedimin e paautorizuar të armëve.
Sipas aktakuzës, I.A. dyshohet se nga janari i vitit 2025 deri më 6 nëntor 2025, në fshatin Isniq të Komunës së Deçanit, ka shpërndarë dhe shitur pa autorizim narkotikë të llojit marihuanë.
Gjatë kontrollit në shtëpinë e tij, sipas Prokurorisë, janë gjetur dhe sekuestruar 131.47 gramë marihuanë, si dhe një pushkë automatike, municion dhe dy granata dore. I.A. dyshohet se këto armë dhe municion i ka poseduar pa autorizim.
Ndërkaq, F.T. dyshohet se nga qershori i vitit 2025 deri më 6 nëntor 2025, në fshatin Drenoc të Deçanit, ka shpërndarë dhe shitur pa autorizim marihuanë.
Gjatë kontrollit në shtëpinë e tij janë gjetur dhe sekuestruar 2.93 gramë marihuanë, si dhe mjete të tjera që, sipas aktakuzës, dyshohet se janë përdorur për përgatitjen dhe paketimin e narkotikëve.
Ndërsa, M.A. dyshohet se më 6 nëntor 2025, në fshatin Drenoc, ka poseduar pa autorizim 0.46 gramë marihuanë, e cila, sipas aktakuzës, dyshohet se ishte për përdorim personal.
Prokuroria ka bërë të ditur se, me këto veprime, të pandehurit dyshohet se kanë përmbushur elementet e veprave penale për të cilat ngarkohen.
Prokurori i rastit i ka propozuar gjykatës që të pandehurit të shpallen fajtorë dhe të dënohen sipas ligjit për veprat penale për të cilat akuzohen.