Sulmi kibernetik ndaj platformës qeveritare e-Albania në Shqipëri, të dielën e 17 korrikut, ka bërë që shërbimet konsullore online të ndërprehen deri në një njoftim të dytë.
Ministria për Evropën dhe Punët e Jashtme të Shqipërisë ka njoftuar se sulmi kibernetik ka dëmtuar sistemin online, i cili mundëson aksesin e qytetarëve dhe strukturave përgjegjëse për aplikimin dhe dhënien e dokumenteve biometrike për të gjitha konsullatat shqiptare në botë.
MEPJ ka theksuar se “është në kontakt të vazhdueshëm me Agjencinë Kombëtare të Shoqërisë së Informacionit, e cila po punon për zgjidhjen sa më të shpejtë të situatës së pazakontë dhe i bën thirrje qytetarëve të mirëkuptojnë gjendjen e përkohshme të mosaksesimit të shërbimeve publike”.
Për këtë situatë ka reaguar dhe Kryeministria e Shqipërisë, duke thënë se sulmi i hakerave vjen nga jashtë Shqipërisë dhe se ai është shumë i sofistikuar dhe sinkronizuar. Më tej, në njoftim thuhet se faqet do të jenë përkohësisht jashtë funksionit deri në shmangien e dëmeve.