“Plakja e shëndetëshme” qe tema e Konferencës Ndërkombëtare të Shkencave Shëndetësore që u mbajt të shtunën në Prishtinë.
Nën organizimin e Institutit të Evropës Juglindore për Politika Shëndetësore dhe Sociale, e me mbështetjen e Kolegjit “Heimerer”, kjo ngjarje mblodhi profesionistë shqiptarë të fushës, si dhe nga disa vende të botës.
Drejtori ekzekutiv i Institutit të Evropës Juglindore për Politika Shëndetësore dhe Sociale, Agron Gashi, tha se popullsia e Kosovës po shkon drejt plakjes.
Gashi: Deri në vitin 2060, rreth 18 për qind e popullsisë së Kosovës pritet të jetë mbi 65 vjeç
“Sipas parashikimeve të Agjencisë së Statistikave të Kosovës, publikimi i korrikut të këtij viti, rritja për periudhën 2035-2060 parashikon se në Kosovë do të jenë rreth 18 për qind e popullsisë, që i bie të bëhen një numër rreth 380 mijë persona mbi 65 vjeç. Këto të dhëna dërgojnë një mesazh special: koha për të vepruar, për t’u përgatitur është tani”, ka theksuar ai.
Sa i përket përballjes me plakjen e popullsisë, bashkëpunim mes institucioneve shëndetësore e akademike për mirëqenienen e shoqërisë kërkoi rektorja e kolegjit Heimerer, Naime Brajshori.
“Kjo përgjegjësi nuk është përgjegjësi vetëm e institucioneve akademike, por edhe e të gjitha institucioneve shëndetësore dhe sociale, por edhe e shoqërisë në përgjithësi. Plakja e shëndetshme nuk lidhet vetëm me zgjatjen e jetës, por me krijimin e kushteve që individi të ruajë dinjitetin, integritetin, autonominë, pjesëmarrjen aktive në shoqëri dhe cilësinë e jetës”, ka deklaruar ai.
Punimin e saj para të pranishmëve e prezantoi edhe profesorsha nga Gjermania.
“Përmes prezantimit tim kam paraqitur kontributin tim në arsimimin e kompetencës për infermieri dhe metodologjitë që kontribojnë pikërisht në mirëqenien e një plakje të shëndetëshme”, ka theksuar Ursula Kriesten, Profesoreshë nga Gjermania.
Në këtë konferencë që u mbajt për herë të 17-të, në dy sesione, u prezantuan dhe u diskutua për punimet shkencore të ekspertëve vendorë e ndërkombëtarë të shendetësisë.