Ministrja e Drejtësisë, Donika Gërvalla, ka thënë se projektligji i propozuar nga Partia Demokratike e Kosovës për Dhomat e Specializuara të Kosovës është duke u analizuar nga ekspertët e Ministrisë së Drejtësisë.
Në konferencë për media, Gërvalla tha se çështjet që lidhen me Dhomat e Specializuara kërkojnë ekspertizë të lartë dhe kujdes të shtuar, në mënyrë që të shmangen gabimet.
“Shumica e gjërave që lidhen me Dhomat e Specializuara janë çështje të ekspertizës së lartë. Nevojitet kujdes i madh që të mos bëjmë gabime. Në Ministrinë e Drejtësisë janë ekspertët që po e analizojnë edhe projektligjin e propozuar nga Partia Demokratike e Kosovës”, ka deklaruar Gërvalla.
Ajo tha se, pasi të përfundojë analiza, Ministria e Drejtësisë do t’ia përcjellë Qeverisë opinionin e saj për projektligjin.
“Kur ta kemi gati, do t’ia dërgojmë Qeverisë opinionin tonë. Nuk do ta vonojmë, shpejt do ta dërgojmë. Por as nuk duam të nxitohemi e ta paguajmë me cilësi të munguar e gabime të papranueshme”, tha ministrja.
Gërvalla theksoi se, sipas saj, për këtë çështje nevojitet bashkëpunim dhe bashkërendim, si dhe analizë e ekspertizë profesionale.
“Më shumë sesa për fjalë, kemi nevojë për bashkëpunim e bashkërendim, analizë e ekspertizë, me qëllim që në fund të fitojë drejtësia”, u shpreh ajo.