Kryetari i Lidhjes Demokratike të Kosovës, Lumir Abdixhiku, ka dalë nga takimi që pati me kryeministrin Albin Kurti.
Pas përfundimit të takimit, Abdixhiku nuk ka dhënë deklaratë dhe nuk ka komentuar nëse gjatë takimit është arritur ndonjë marrëveshje apo nëse ka pasur dakordim për çështjen e zgjedhjes së Presidentit, njofton Dukagjini.
Takimi mes Kurtit dhe Abdixhikut u zhvillua një ditë pas takimit të kryeministrit me kryetarin e PDK-së, Bedri Hamza. Edhe nga takimi Kurti-Hamza nuk pati ndonjë marrëveshje konkrete.
Bisedimet mes liderëve politikë po zhvillohen në kohën kur kanë mbetur edhe pak ditë deri në përfundimin e afatit për zgjedhjen e Presidentit të Kosovës.
Kuvendi ka afat deri më 6 tetor për ta zgjedhur Presidentin e ri. Nëse zgjedhja nuk realizohet brenda afatit kushtetues, vendi shkon në zgjedhje të reja.