Pas një minitelenovele që ndodhi me lëvizjen e mundshme të Vedat Muriqit te Club Brugge në Belgjikë, tani gjithçka është kthyer në vendin e vet, me Muriqin që ka vazhduar aty ku vlerësohet më shumë, te Mallorca në Spanjë.
Sulmuesi kosovar përfundimisht u largua nga Lazio, me skuadrën iberike që për shërbimet e tij pagoi diku rreth 10 milionë euro – por shifra ende nuk dihet.
Ndryshe ndodh me pagën, që tashmë është zbuluar për të gjithë tifozët e futbollistit dhe klubit.
Golashënuesi më i mirë në histori të Kosovës me piratët ka nënshkruar kontratë 5-vjeçare dhe ai do të jetë futbollisti më i paguar në skuadër.
Në javë, Muriqi do të përfitojë 42 mijë euro që përkthehet në plot 2.2 milionë euro neto në vit.
Kontrata përfundimtare, pra ajo pesë vjeçare ka vlerë 11 milionë euro.
Muriqi është vetëm një nga dy futbollistët e Mallorca-s që përfiton më shumë se 1 milionë euro në vit, me të dytin në listë që është Pablo Maffeo me 1.8 milionë.