“Bllokimi i rrugëve në Veri të Kosovës paralajmëron një diçka më shumë se Asociacioni i Komunave me shumicë serbe, ndoshta dhe ndarje të territorit të Kosovës”
Eksperti i sigurisë Nuredin Ibishi, ka folur për Portalin Dukagjini, lidhur me situatën e krijuar në Veri të Kosovës, pas vendimit të Qeverisë Kurti 2, për të zbatuar masat e reciprocitetit me Serbinë dhe zbatimin e vendimit të qeverisë për të ndaluar veturat që lëvizin më targat “KM”, ku ka thënë se “paralajmërimi i hershëm i institucioneve të Kosovës për masat e reciprocitetit, kishte nxitur reagime të menjëhershme të udhëheqësve serbë.”
Ibishi ka rikujtuar fjalët e presidentit të Serbisë Aleksandar Vuçiqit, ku kishte thënë se situata nuk kishte qenë asnjëherë më e tensionuar. Ndërsa, Ibishi ka folur edhe për deklaratat e zyrtarit së ashtuquajtur drejtor për Kosovën në qeverinë e Serbisë, Petar Petkoviq ku kishte thënë ‘mënjëherë të themelojnë Asociacionin e komunave me shumicë serbe, që sipas tij, kjo është shkëputje e sovranitetit të Kosovës.
“Në Veri të Kosovës, serbët me çdo kusht duan që ta provokojnë situatën, sepse ata duan me ta formojnë Asociacionin e Komunave me shumicë serbe (AKS)”.
“Serbët po dëshirojnë të krijojnë autonomi me organe ekzektutive, diçka të ngjashme me Republikën Srpksa në Bosnjë dhe Hercegovina, e cila do të jetë në shërbim të Serbisë.”
Sipas Ibishit, serbët janë të vendosur që ta provokojnë situatën, sepse ata ishin të përgatitur që nga fillimi për këtë gjë.
“Institucionet e sigurisë është dashur që me kohë të jenë të përgatitur për këtë situatë”, ka thënë eksperti i sigurisë, Nuredin Ibishi për Portalin Dukagjini.
Për të, Policisë së Kosovës i ka munguar bashkëpunimi më KFOR-in dhe nuk i ka marrë seriozisht kërcënimet nga Veriu i Kosovës. Po ashtu, sipas tij, nuk është dashur që policia të lejojë që rrugët të bllokohen.
“Bllokimi i rrugëve mund të ndodhë një herë por jo përherë, që në të njëjtën mënyrë të bllokohen rrugët me mjete të rënda e zhavor, kur dihet se kjo është ajo që i sanksionion policinë për të kryer detyrën e tyre”, ka përfunduar eksperti i sigurisë.