Ambasadori i Shteteve të Bashkuara të Amerikës (ShBA) në Kosovë, Jeff Hovenier, është takuar të enjten me kryetarin e Listës Serbe, Goran Rakiq.
Hovenier ka bërë të ditur se me të kanë biseduar për ngjarjet e fundit në veri të Kosovës, dhe për rëndësinë e uljes së tensioneve.
Ambasadori amerikan e ka ripërsëritur qëndrimin e tij se veprimet e fundit për reciprocitet janë në një linjë me marrëveshjet e Brukselit.
“Sapo e takova Rakiqin… në kontekstin e ngjarjeve të fundit, folëm rëndësinë për deeskalimin e gjendjes, i rikujtova pozicionin e SHBA-së, në disa prej çështjeve, për masën e reciprocitetit që Qeveria e Kosovës deshti ta implementojë, nga perspektiva jonë është në konsistencë me marrëveshjet e Brukselit, është legjitime”, ka deklaruar ambasadori Hovenier.
Në takim sipas ambasadorit amerikan është diskutuar edhe për shqetësimet e ngritura nga komuniteti i serbëve të Kosovës.
Sipas tij, me kryetarin e Listës Serbe janë pajtuar se takimi në Bruksel në mes të kryeministrit Albin Kurti dhe presidentit Aleksandër Vuçiq, është shumë i rëndësishëm për uljen e tensioneve në veri.
“Por po ashtu folëm rëndësinë e shqetësimeve të serbëve të Kosovës, dhe për elementet se si duhet të vazhdojnë gjërat. U pajtuam për rëndësinë e takimit të presidentit Vuciq dhe kryeministrit Kurti në Bruksel më vonë gjatë muajit. Duhet ta shikojnë mënyrën sesi të deeskalizohet”, ka thënë Hovenier.
Hovenier ka thënë se i ka përmendur Rakiqit vendimin e Qeverisë amerikane për futjen në listë të zezë të anëtarit të Listës Serbe, Milan Radojçiq.