Nënkryetarja e Prishtinës, Donjeta Sahatçiu, ka bërë të ditur se të martën ka filluar diskutimi publik mbi draft strategjinë kombëtare dhe planin e veprimit për menaxhimin dhe kontrollin e qenve me dhe pa pronar 2022-2028.
Përmes një reagimi në Facebook, ajo ka thënë se është “befasuese përfaqësimi i mangët institucional dhe pjesëmarrja e ulët e publikut”.
Ajo ka thënë se problemi me qentë mbetet një nga sfidat kryesore të Komunës së Prishtinës, “sidomos në prag të sezonës së ftohtë”.
Sahatçiu, u ka bërë thirrje qytetarëve të Prishtinës t’i dërgojnë komentet e tyre tek emaili i saj.
“Kryeqyteti do të dorëzojë komentet nesër (17/8), me ç’rast i ftoj qytetarët që nuk kanë arrit të komentojnë deri tash, të dërgojnë përshtypjet tek e fundit edhe tek emaili im [email protected] deri sot ora 17:00”, ka shkruar Sahatçiu në Facebook.
Në fund, nënkryetarja e Prishtinës ka thënë se është e rëndësishme të adresohen ankesat apo shqetësimet më herët dhe jo kur ligji kalon në Kuvendin Komunal.