Ministria e Kulturës, Rinisë dhe Sportit (MKRS) ka njoftuar se ka nisur zbatimi i projektit “Trashëgimia Kulturore si Nxitëse për Ringjallje Ekonomike të Janjevës”, i cili ka për qëllim mbrojtjen e trashëgimisë kulturore dhe sigurimin e ringjalljes socio-ekonomike.
MKRS-ja ka bërë të ditur se për të realizuar projektin në Janjevë Qeveria e Kosovës ka financuar me 1.4 milionë, ndërsa Bashkimi Evropian me 2 milionë euro.
“Me 1.4 milion euro nga Qeveria e Republikës së Kosovës dhe 2 milionë nga Bashkimi Evropian, projekti “Trashëgimia Kulturore si Nxitëse për Ringjallje Ekonomike të Janjevës” filloi zbatimin, me fokus në mbrojtjen e trashëgimisë kulturore dhe sigurimin e ringjalljes socio-ekonomike”, thuhet në njoftimin zyrtar nga MKRS-ja.
Në projekt parashihen ndërhyrje restauruese dhe revitalizuese në 13 shtëpi të vjetra, hartimi i Strategjisë për Zhvillim të Turizmit Kulturor dhe Natyror, fuqizimi ekonomik dhe ngritja e kapaciteteve lokale për zhvillim të qëndrueshëm lokal, e mbështetja e komunitetit përmes subvencioneve.
Po ashtu, MKRS-ja ka njoftuar se në vizitë në Janjevë ishin prezent kryetari i Kuvendit tëKosovës, Glauk Konjufca, ministri i Kulturës, Rinisë dhe Sportit, Hajrulla Çeku, kryetari i komunës së Lipjanit, Imri Ahmeti, të shoqëruar nga stafi i projektit të Programit të Kombeve të Bashkuara për Zhvillim (UNDP).
Gjatë vizitës ata bënë një përditësim mbi gjendjen aktuale të projektit dhe punën që do të bëhet në vazhdim.