Kryetari i Lidhjes Demokratike të Kosovës, Lumir Abdixhiku, përmes një postimi në rrjetin social Facebook, ka reagur ndaj Qeverisë së Kosovës, për vonesat për sigurimin e energjisë elektrike.
Abdixhiku ka thënë se Blloku A5 i KEK-ut, nuk po kryen mirëmbajtje të rregullt dhe me kohë.
Për këtë, ai e fajëson Qeverinë e Kosovës, duke thënë se “Do të qëndrojë kështu për shumë kohë sepse Qeveria e Kosovës, sikurse në çdo temë tjetër, është e vonuar të veprojë. Verës pushon, dimrit nis të mirëmbajë – këso praktike të mbrapshtë nuk njeh asnjë shtet”.
Ai këtë e quan edhe si neglizhencë të praktikantëve, dhe një interes madhor që përfiton miliona euro nga tenderet riparuese për blerje të energjisë e cila nuk po prodhohet.
Abdixhiku ka ftuar Prokurorinë e Kosovës t’i hetojë këto vonesa në mirëmbajtjen e Bllokut A5, si dhe Qeverinë e Kosovës që të nisë çdo përgatitje të nevojshme për një dimër me energji.