Ministria e Mbrojtjes në Shqipëri ka reaguar në lidhje me incidentin që ka ndodhur mbrëmjen e sotme në Uzinën ushtarake në Gramsh.
“Tre shtetas me pasaporta ruse dhe ukrainase kanë tentuar të hyjnë në uzinë. Menjëherë kanë reaguar efektivët që ishin në ruajtje të uzinës, por gjatë përpjekjeve për t’i ndaluar 3 shtetasit e huaj janë lënduar dy ushtarakët tanë, të cilët janë nën kujdesin e mjekëve në spitalin e Traumës në Tiranë”, thuhet në deklaratën e Ministrisë së Mbrojtjes së Shqipërisë.
Në reagimin e minisitrisë thuhet se shtetasit e huaj janë ndaluar nga autoritetet, ndërsa vijojnë hetimet për të zbardhur rrethanat e ngjarjes.
“Gjendja shëndetësore e dy ushtarakeve shqiptare është e stabilizuar”, thuhet mes tjerash në deklaratën e Ministrisë së Mbrojtjes së Shqipërisë.
Të shtunën e 20 gushtit, dy ushtarë shqiptarë të cilët ishin caktuar me detyrë për ruajtjen e Uzinës së Përpunimit të Armëve në Gramsh, kanë mbetur të plagosur mbrëmjen e sotme pasi janë përplasur fizikisht me tre shtetas rusë, të dyshuar si agjentë.